قومی کرکٹ ٹیم کے کپتان بابر اعظم نے خود پر کڑی تنقید کرنے والے معروف ، سینئر صحافی آفتاب اقبال کو پہچاننے سے ہی انکار کر دیا ہے۔
I don’t know who Aftab Iqbal is, says Captain @babarazam258 https://t.co/CvABjKtGYk
— Murtaza Ali Shah (@MurtazaViews) October 13, 2022
سہ ملکی ٹی ٹوئنٹی سیریز کے سلسلے میں آج پاکستان نے بنگلہ دیش کو شکست سے دوچار کیا۔
بعد ازاں پریس کانفرنس کے دوران بابر اعظم سے ایک سپورٹس صحافی نے سوال کیا کہ آپ پر تنقید کی جا رہی ہے کہ بطور ٹیم کے کپتان آپ موزوں نہیں ہیں۔ سینئر صحافی آفتاب اقبال نے آپ پر کڑی تنقید کی ہے ، اس سے متعلق آپ کیسا محسوس کرتے ہیں۔
اس سوال کے جواب میں بابر اعظم کا کہنا تھا کہ مجھے نہیں معلوم آپ کس کی بات کر رہے ہیں، میں نہیں جانتا کہ آفتاب اقبال کون ہے۔
بابر اعظم کا کہنا تھا کہ تنقید اور تعریف چلتی رہتی ہے اور پھر جب برا پر فارم کریں تب تو سب تنقید کے لیے تیار رہتے ہیں، ہم ان چیزوں پر دھیان نہیں دیتے، کوشش ہوتی ہے جتنا ٹیم کو اعتماد دیا جاسکے دیں اور اچھی طرح ٹیم چلائیں۔
یاد رہے کہ آفتاب اقبال نے بابر اعظم کو ’سٹار‘ ماننے سے انکار کرتے ہوئے کہا تھا کہ بابر اب میرے لیے سٹار نہیں ہے، اس لیے نہیں کہ اس نے کیچز چھوڑے یا سکور نہیں بنا رہا بلکہ اس لیے کہ اب وہ مغرور ہو گیا ہے، اس میں اب انا آ گئی ہے ، وہ کھلاڑیوں سے اختلافات رکھنے لگا ہے۔
واضح رہے کہ سہ ملکی ٹی ٹوئنٹی سیریز کے آخری گروپ میچ میں پاکستان نے بنگلادیش کو 7 وکٹ سے شکست دی، گرین شرٹس نے 174 رنز کا ہدف آخری اوور میں حاصل کیا۔
بابر اعظم نے اس میچ میں 55 رنز کی اننگز کھیلی، جس میں9 چوکے شامل تھے۔