خبریںدلچسپ و حیرت انگیزدنیا سے

وقت کے پابند ملازمین کو ہر ہفتے خصوصی بونس ملے گا

معروف ای کامرس ویب سائٹ اور ادارے ایما زون نے وقت کی پابندی کرنے والے ملازمین کو ہر ہفتے خصوصی بونس دینے کا اعلان کردیا۔

دی سن کی رپورٹ کے مطابق ایمازون کی جانب سے یہ پیش کش ویئرہاؤس میں کام کرنے والے ملازمین کو دی گئی ہے کہ وہ روزانہ وقت پر دفتر آئیں اور اپنا کام کریں۔

ایمازون کے مطابق ایسے ملازمین کو ہر ہفتے 50 برطانوی پاؤنڈ بطور بونس دیے جائیں گے، اس کے علاوہ چھٹی نہ کرنے والے ملازم کو علیحدہ سے رقم بھی دی جائے گی۔

کمپنی کے مطابق ملازمین کو یہ رقم 100 فیصد حاضری، وقت کی پابندی پر دی جائے گی، بیماری یا معذوری کی صورت میں کی جانے والی چھٹیاں شمار نہیں کی جائیں گی۔

ایمازون کے ترجمان نے کہا کہ ’ہم نے گرمیوں کی طلب کو دیکھتے ہوئے ملازمین کے لیے یہ اعلان کیا کیونکہ ایمازون کے اسٹورز پر ’سمر فیسٹیول‘ لگایا جائے گا۔

واضح رہے کہ 1994 میں جیف بیزوس کے گیراج سے شروع ہونے والی کمپنی ایمازون اب دنیا کی سب سے بڑی اور اہم ترین ٹیکنالوجی کمپنیوں میں سے ایک ہے لیکن اس کا آغاز ایک آن لائن کتاب بیچنے کی ویب سائٹ کے طور پر ہوا تھا۔

ایمازون نے اپنے ستائیس سالہ سفر کو اس قدر کامیابی سے طے کیا کہ اب یہ ماہانہ اربوں ڈالرز کا کاروبار کرنے والی کمپنی بن چکی ہے، جہاں صرف کتابیں ہی نہیں بلکہ دنیا بھر سے ہر قسم کے سامان کی خریدوفروخت کی جاتی ہے۔

Leave a Reply

Back to top button