پاکستانتازہ ترین

وزیرِ اعظم کی چینی صدر سے آج صبح ملاقات, دو طرفہ تعلقات اور عالمی صورتِ حال پر گفتگو ہوئی

وزیرِ اعظم عمران خان نے آج صبح چین کے دارالحکومت بیجنگ میں چینی صدر شی جن پنگ سے ملاقات کی جس کے بعد وہ وطن واپس روانہ ہو گئے۔

چینی صدر شی جن پنگ سے ملاقات کے دوران وزیرِ اعظم عمران خان کی ان سے دو طرفہ تعلقات اور عالمی صورتِ حال پر گفتگو ہوئی۔

ملاقات کے بعد وزیرِ اعظم عمران خان چین سے وطن روانگی کے لیے بیجنگ ایئر پورٹ پہنچے جہاں پاکستانی سفارت خانے کے عہدے داروں نے انہیں الوداع کیا۔

وزیرِ اعظم عمران خان نے گزشتہ روز چین کے صدر شی جن پنگ کے ظہرانے میں شرکت کی تھی، جہاں انہوں نے چینی ہم منصب لی کی چیانگ سے ملاقات کی تھی۔

انہوں نے چائنا انرجی اینڈ انجینئرنگ کارپوریشن اور پاور چائنا کے چیئرمین سے آن لائن ملاقات کی تھی۔

رپورٹس کے مطابق ان ملاقاتوں میں پاکستان کے توانائی کے شعبے کی بہتری اور سرمایہ کاری پر گفتگو ہوئی۔

ملاقات کے موقع پر وزیرِ خارجہ شاہ محمود قریشی، وزیرِ خزانہ شوکت ترین، وزیرِ اطلاعات فواد چوہدری، وزیرِ منصوبہ بندی اسد عمر اور مشیرِ تجارت عبدالرزاق داؤد بھی موجود تھے۔

رپورٹس کے مطابق چین میں وزیرِ اعظم عمران خان نے ازبکستان کے صدر سے بھی ملاقات کی تھی۔

اپنے دورۂ چین کے دوران وزیر اعظم عمران خان چین کے اہم اداروں کے سربراہوں سے بھی ملاقاتیں کر چکے ہیں۔

ان ملاقاتوں میں ڈیجیٹل، صحت، تجارت اور صنعتی راہداریوں کے قیام کا فیصلہ کیا گیا تھا جبکہ سی پیک کے جاری منصوبوں پر پیش رفت کا جائزہ بھی لیا گیا تھا۔

واضح رہے کہ وزیرِ اعظم عمران خان 3 فروری کو 4 روزہ دورے پر چین پہنچے تھے۔

وفاقی وزیرِ اطلاعات و نشریات فواد چوہدری، وزیرِ خارجہ مخدوم شاہ محمود قریشی، وزیرِ خزانہ شوکت ترین، وزیرِ منصوبہ بندی اسد عمر، مشیرِ قومی سلامتی معید یوسف، مشیرِ تجارت عبدالرزاق داؤد اور معاونِ خصوصی برائے سی پیک خالد مصطفیٰ بھی ان کے ہمراہ تھے۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button