تازہ ترینسیاسیات

نیب کو قمرجاوید باجوہ کنٹرول کررہا تھا، عمران خان

چیئرمین تحریک انصاف عمران خان نے کہا ہے کہ قومی احتساب بیورو کو قمر جاوید باجوہ کنٹرول کررہا تھا، باجوہ نے ہمیں الیکشن کرانے کا کہہ کر ٹرک کی بتی کے پیچھے لگا دیا۔

یہ بات انہوں نے ایک نجی ٹی وی چینل کو خصوصی انٹرویو دیتے ہوئے کہی، انہوں نے قمر باجوہ پر ایک بار پھر ڈبل گیم کھیلنے کا الزام عائد کردیا، قومی احتساب بیورو (نیب) کے حوالے سے بات کرتے ہوئے عمران خان کا کہنا تھا کہ نیب پر ہمارا کوئی کنٹرول نہیں تھا بلکہ نیب کو قمر باجوہ کنٹرول کررہا تھا۔

انہوں نے کہا کہ انہوں نے باجوہ کے کہنے پر دونوں صوبائی اسمبلیاں تحلیل کیں، باجوہ نے ہمیں الیکشن کرانے کا کہہ کر ٹرک کی بتی کے پیچھے لگا دیا، ایکسٹینشن سے پہلے الگ باجوہ تھا اور ایکسٹینشن کے بعد الگ باجوہ تھا، ایکسٹینشن کے بعد اسے ن لیگ سے عشق ہوگیا اور ڈیل کے بعد چوروں کو مسلط کردیا گیا۔

سابق وزیر اعظم نے بتایا کہ میں نے روس کا دورہ بھی سابق آرمی چیف کے مشورے سے کیا تھا مگر واپسی پر میرے خلاف تحریک عدم اعتماد آگئی اور باجوہ نے امریکیوں کو بھی ان کے خلاف بھڑکایا، مجھے اسمبلیاں توڑنے کا کوئی افسوس نہیں ہے۔

عمران خان نے کہا کہ اگر پاکستان میں قانون کی حکمرانی نہیں ہوگی تو ملک نہیں چل سکتا، حکومت سپریم کورٹ کا فیصلہ نہیں مانتی تو پھر کس نے آنا ہے؟ اگر مارشل لاء لگایا گیا تو پھر ہمیں کسی دشمن کی ضرورت نہیں۔

عمران خان نے کہا کہ ہمارا ایک کروڑ اوورسیز پاکستانی کیوں یہاں سرمایہ کاری نہیں کرتا؟ سرمایہ کاروں کا کہنا ہے کہ ہمیں حکومت پر اعتماد نہیں ہے، انہوں نے کہا کہ ملک میں استحکام آنے تک بیرونی سرمایہ کاری نہیں آسکتی، کرپٹ مافیاز کچھ نہیں کرنے دیں گے۔

اپنی گفتگو میں انہوں نے نواز شریف اور آصف زرداری پر بھی کرپشن کا الزام عائد ہوئے انہیں کڑی تنقید کا نشانہ بنایا، چیئرمین پی ٹی آئی کا کہنا تھا کہ نوازشریف نے اقتدار میں آنے کے بعد 17فیکٹریاں بنائیں، ملک کو نقصان نواز شریف اور رشوت کے کلچر نے پہنچایا، اس کو وزیراعظم بنانے کیلئے ملک کے ادارے تباہ کیے گئے۔

موجودہ عدالتی معاملات پر بات کرتے ہوئے انہوں نے واضح کیا کہ آئین پر عمل درآمد کیلئے ہم سپریم کورٹ کے ساتھ کھڑے ہیں۔ سپریم کورٹ کا فیصلہ نا مانا گیا تو عوام کے ساتھ سڑکوں پر نکلیں گے، سپریم کورٹ کو آئین کے تحت فیصلہ کرنا چاہیے، سپریم کورٹ کا کام یہ نہیں کہ فیصلے پرعمل درآمد ہوگا یا نہیں۔

ایک سوال کے جواب میں عمران خان کا کہنا تھا کہ ہمارے ساتھ جو کچھ ہوا دنیا میں کسی کے ساتھ نہیں ہوا، صرف مجھے حکومت سے باہر رکھنے کے لیے کتنی بڑی قیمت ادا کی جارہی ہے۔

سندھ کی صورتحال پر گفتگو کرتے ہوئے ان کا کہنا تھا کہ اب پاکستان بدل رہا ہے، نوجوان تیار ہورہے ہیں، سندھ کے عوام سب سے زیادہ تبدیلی چاہتے ہیں کیونکہ جو پہلے ایم کیوایم لوگوں کے ساتھ کیا کرتی تھی وہی ظلم پیپلز پارٹی اندرون سندھ کرتی ہے

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button